Møtereglement for styre, råd og utval 2024 (Ksak 102/24)

Kapittel 10 - Særskilde reglar for ungdomsrådet og BUK

§ 10-1 Føremål

Ungdomsrådet skal bidra til å sikra brei, open og tilgjengeleg medverknad i saker som gjeld barn og ungdom. Rådet skal vera talerøyr for ungdom i kommunen overfor folkevalde organ og den andre leiinga til kommunen. Rådet skal representera interessa til barn og unge i kommunen, og har rett til å uttala seg i saker som gjeld eller vil påverka barn og unge.

Det er viktig at barn og unge i kommunen er kjend med at dei kan bruka rådet til å få klargjort sine saker inn mot det politiske miljøet.

Rådets medlemmer skal vera engasjerte og villige til å gjera ein innsats for at kommunen skal forbetrast for barn og unge i kommunen.

§ 10-2 Val og samansetting

Det må veljast nye medlemmar til Hjelmeland ungdomsråd kvart år, då ungdomsskuleelevane sit for eitt år om gongen. Medlemer som vert velde når dei er mellom 16 og 18 år sit i to år.

Rådet skal bestå av 7 faste medlemer og 4 varamedlemer. Minst 3 medlemer skal vera frå ungdomsskulen, og fire medlemer 16-18 år, men ikkje ha fylt 19 år på valtidspunktet. Eit av varamedlemmene skal vera frå ungdomsskulen. Det skal leggast til rette for at ungdommane kan nominera kandidatar til rådet.

Det skal innhentast skriftleg samtykke frå ungdommen før desse blir innstilte. For ungdom under 15 år skal det i tillegg innhentast skriftleg løyve frå ein føresett som stadfestar at dei kan stilla til val.

Ungdomsrådet skal vera eit partipolitisk nøytralt organ.

Valkomiteen innstiller samansetninga til rådet til kommunestyret. Innstillinga skal vareta kravet til kjønnsbalanse i koml. § 7-7 tredje avsnitt. Det skal og oppnemnast leiar og nestleiar.

Medlemene og varamedlemene til ungdomsrådet skal sitja i vervet fram til nytt val er gjennomført innan utgangen av november kvart år. Første val blir fortrinnsvis gjort i konstituerande kommunestyremøte etter kommunevalet.

§ 10-3 Mynde

Ungdomsrådet skal vera eit rådgivande organ for andre folkevalde organ. Administrasjonen kan nytta rådet som medverknads- og høyringsorgan.

Rådet har rett til å uttala seg i alle saker som berører barn og ungdom, men rådet skal ikkje behandla saker som gjeld avgjerder overfor enkeltpersonar.

Rådet skal ha høve til å uttala seg til alle saker innanfor ansvarsområdet sitt som skal til behandling i kommunestyret. Dersom saka blir førebudd i eit hovudutval eller formannskapet, skal uttalen frå rådet innhentast før saka blir behandla i desse organa, slik at den eventuelle uttalen frå rådet ligg føre ved behandling av saka i nemnde organ.

Saker innanfor ansvarsområdet til rådet, som blir vedteke endeleg i eit hovudutval eller i formannskapet, skal på same måte sendast rådet for uttale før behandling i første organ.

Rådets uttale skal følgja saksdokumenta til det folkevalde organet som gjer endeleg vedtak i saka.

Rådet kan på eige initiativ ta opp saker som gjeld barn og ungdom. Slike saker skal sendast til behandling/oppfølging i det hovudutvalet som har ansvar for det aktuelle saksområdet. Rådet skal få tilbakemelding etter behandling i hovudutvalet eller overordna organ.

Ungdomsrådet skal givast høve til å uttala seg før kommunestyret vedtek nytt, eller gjer endringar i reglementet for ungdomsrådet.

§ 10-4 Ansvarsområde

Ungdomsrådet skal aktivt arbeida med, m.a. gi rådgivande utsegner i saker innanfor ansvarsområda sine, under dette m.a. saker om:

• Årsbudsjetta til kommunen og økonomiplanar
• Kommuneplan og kommunedelplanar
• Reguleringsplaner, særleg spørsmål om tilrettelagde uteområde for leik og opphald, grøntareal og by- og nærmiljøutvikling tilrettelagt for unge
• klima- og miljøsaker
• Mobilitet
• Helse-, pleie og omsorgstilbod for barn og ungdom
• Saker om folkehelse, psykisk helse og førebyggjande arbeid retta mot ungdom
• Saker om kultur, idrett og fritidstilbod rette mot barn og unge
• Opplæring og skuletilbod

Rådet skal så snart som mogleg etter konstituering vedta ei oversikt over kva fokusområde rådet skal jobba med i den kommande toårsperioden.

Alle medlemmene, utanom leiar og nestleiar skal få eitt eller fleire ansvarsområde som dei skal følgja opp spesielt. I dette ligg oppfølging av saker som kjem inn til rådet frå administrasjonen eller folkevalde organ, direkte frå barn og unge, eller frå organisasjonar som varetek interessene til barn og unge (under dette elevråd). Medlemmene kan på eige initiativ ta opp saker som gjeld barne- og unges interesser innanfor ansvarsområdet sitt. Følgjande ansvarsområde bør varetakast:

• Utdanning
• Kultur, idrett og fritid
• Tettstadsutvikling
• Samferdsel 
• Natur- og klima
• Sosialt miljø

§ 10-5 Saksbehandling

Rådet held møte etter ein møteplan vedteke av kommunestyret og elles når leiaren finn det nødvendig, eller når minst 1/3 av medlemene krev det.

Rådet behandlar sine saker i møte. Varamedlemene til ungdomsrådet har fast møte- og talerett på alle møte. Innkalling og saksdokument blir sende digitalt.

Det generelle reglementet for saksbehandling i folkevalde organ gjeld for møte i ungdomsrådet.

Rådet kan be kommunedirektøren informera rådet om enkeltsaker og framdrift/resultat av saker rådet har fremja.

§ 10-6 Barn og unge sitt kommunestyre

Barn og unges kommunestyre (BUK) er eit formelt representasjonsråd for barn og unge i Hjelmeland kommune. Det er 19 medlemmar i rådet. BUK er sett saman av barn og unge frå og med 5. klasse til og med 10. klasse. Elevrådet på kvar skule har ansvar for å oppnemne medlemmer frå sin skule, etter initiativ frå administrasjonen.

Barn og unges kommunestyre og ungdomsråd Barn og unges kommunestyre er sjølvstendig i høve til ungdomsrådet, men saker kan sendes ungdomsrådet for uttale.

Representasjon i BUK: 

• Årdal skule: 4 
• Fister skule: 4 
• Hjelmeland barneskule: 4 
• Jøsenfjorden: 2 
• Hjelmeland ungdomsskule: 5

Leiar og nestleiar vert vald i første møte i året. Desse sit for eit år av gongen.

Barn og unge sitt kommunestyre blir gjennomført med to møte i løpet av kalenderåret. Møta blir halde etter modell for gjennomføring av eit ordinært kommunestyremøte, og følgjer reglementet for saksbehandling.

Barn og unge sitt kommunestyre kan:

•  gje uttale til politiske saker til kommunestyret
• handsame saker frå medlemene, eller elevråda på skulane, på eige initiativ
• be kommunedirektøren om å greia ut aktuelle saker dei vil handsama
• behandla og løyva øyremerkte økonomiske midlar til tiltak for barn og unge, så framt det er sett av midlar til dette i kommunebudsjettet

Aministrasjonen kan senda saker som vert vurdert som viktige når det gjeld barn og unge til BUK.

Sjå heile reglementet for Barn og unge sitt kommunestyre her (PDF, 2 MB)

Kapittel 11 - Særskilde reglar for råd for menneske med funksjonshindring

§ 11-1 Føremål

Rådet skal bidra til å sikra brei, open og tilgjengeleg medverknad i saker som gjeld personar med funksjonshindring. Rådet skal vera talerøyr for personar med funksjonshindring i kommunen overfor folkevalde organ og øvrig leiing i kommunen. Rådet skal representera personar med funksjonshindring sine interesser i kommunen, og har rett til å uttala seg i saker som gjeld eller vil påverka personar med funksjonshindring.

Det er viktig at personar med funksjonshindring i kommunen er kjend med at dei kan bruka rådet til å få klargjort sine saker inn mot det politiske miljøet.

Rådets medlemmer skal vera engasjerte og villige til å gjera ein innsats for at kommunen skal forbetrast for alle personar med funksjonshindringar i kommunen.

§ 11-2 Val og samansetning

Medlemer og varamedlemer blir valde av kommunestyret sjølv. Medlemene blir valde for valperioden.

Rådet skal bestå av 4 medlemer og 3 varamedlemer. I tillegg skal rådet ha ein politisk medlem med personleg vara.

Medlemer og varamedlemer bør vera folkeregistrert i kommunen.

4 av kandidatane til rådet blir foreslåtte av organisasjonar som representerer personar med ulike funksjonsnedsetjingar. 1 av kandidatane til rådet skal veljast blant medlemer eller varamedlemer av kommunestyret.

Valkomiteen innstiller samansetninga til rådet til kommunestyret. Innstillinga skal vareta kravet til kjønnsbalanse i koml. § 7-7 tredje avsnitt.

Rådet vel sjølv leiaren og nestleiaren sin.

§ 11-3 Mynde

Rådet skal vera eit rådgivande organ for andre folkevalde organ. Administrasjonen kan nytta rådet som medverknads- og høyringsorgan.

Rådet har rett til å uttala seg i alle saker som berører personar med funksjonsnedsetjing, men rådet skal ikkje behandla saker som gjeld avgjerder overfor enkeltpersonar.

Rådet skal ha høve til å uttala seg til alle saker innanfor ansvarsområdet sitt som skal til behandling i kommunestyret. Dersom saka blir førebudd i eit hovudutval eller formannskapet, skal uttalen frå rådet innhentast før saka blir behandla i desse utvala, slik at rådets evt. utsegner ligg føre ved behandling av saka i nemnde utval.

Saker innanfor ansvarsområdet til rådet som blir vedteke endeleg i eit hovudutval eller i formannskapet, skal på same måte sendast rådet for uttale før behandling i første utval.

Rådets uttale skal følgja saksdokumenta til det folkevalde organet som gjer endeleg vedtak i saka.

Rådet kan på eige initiativ ta opp saker som gjeld personar med funksjonshindringar. Slike saker skal sendast til behandling/oppfølging i det hovudutvalet som har ansvar for det aktuelle saksområdet. Rådet skal få tilbakemelding etter behandling i hovudutvalet eller overordna organ.

Rådet skal givast høve til å uttala seg før kommunestyret vedtek nytt, eller gjer endringar i reglementet for rådet.

§ 11-4 Ansvarsområde

Rådet skal aktivt arbeida med, m.a. gi rådgivande utsegner i saker innanfor ansvarsområda sine. Dette omfattar mellom anna saker om å sikra tilgjengelegheit, arbeid mot diskriminering på grunnlag av nedsett funksjonsevne og tenester/tilretteleggingsbehov for menneske med nedsett funksjonsevne innanfor sakstypar som:

• Årsbudsjetta til kommunen og økonomiplanar
• Kommuneplan og kommunedelplanar
• Byggetiltak – særleg offentlege bygg
• Reguleringsplaner, særleg spørsmål om tilrettelegging og tilgjengelegheit, tilrettelagde uteområde og by- og nærmiljøutvikling tilrettelagt for personar med funksjonsnedsetjing
• Mobilitet
• Helse-, pleie og omsorgstilbod for personar med funksjonsnedsetjing
• Saker om folkehelse og førebyggjande arbeid retta mot personar med funksjonsnedsetjing
• Saker om kultur, idrett og fritidstilbod retta mot personar med funksjonsnedsetjing
• Digitalisering og bruk av velferdsteknologi
• Opplæring og arbeid for personar med funksjonsnedsetjing
   

Rådet kan så snart som mogleg etter konstituering vedta ei oversikt over kva fokusområde rådet skal jobba med i den kommande fireårsperioden.

I dette ligg både oppfølging av saker som kjem inn til rådet frå administrasjonen, frå folkevalde organ eller frå organisasjonar som varetek personar med funksjonsnedsetjing. Følgjande ansvarsområde bør varetakast:

• Arbeid og utdanning
• Kultur, idrett og fritid
• Tettstadsutvikling
• Samferdsel og mobilitet
• Digitalisering og teknologi
• Helse og omsorg

§ 11-5 Saksbehandling

Rådet held møte etter ein møteplan vedteke av kommunestyret og elles når leiaren finn det nødvendig, eller når minst 1/3 av medlemmene krev det.

Rådet behandlar sine saker i møte. Innkalling og saksdokument blir sende digitalt.

Det generelle reglementet for saksbehandling i folkevalde organ gjeld for møte i dette rådet.

Rådet kan be kommunedirektøren informera rådet om enkeltsaker og framdrift/resultat av saker rådet har fremja.

§ 11-6 Årsberetning

Rådet skal kvart år utarbeida ei årsmelding rundt verksemda si, som blir framlagd for kommunestyret seinast i april det etterfølgjande året.

Årsmeldinga bør innehalda oversikt over talet på møte gjennomført sist år, kva saker som er behandla, og dessutan ei forklaring over dei mest sentrale sakene rådet planlegg å jobba med framover.

Kapittel 12 – Særskilde reglar for seniorrådet

§ 12-1 Føremål

Seniorrådet skal bidra til å sikra brei, open og tilgjengeleg medverknad i saker som gjeld eldre. Seniorrådet skal vera talerøyr for eldre i kommunen overfor folkevalde organ og den andre leiinga til kommunen. Rådet skal representera interessene til eldre i kommunen, og har rett til å uttala seg i saker som gjeld eller vil påverka eldre.

Det er viktig at eldre i kommunen er kjend med at dei kan bruka rådet til å få klargjort sine saker inn mot det politiske miljøet.

Rådets medlemer skal vera engasjerte og villige til å gjera ein innsats for at kommunen skal forbetrast for alle eldre i kommunen.

§ 12-2 Val og samansetting

Medlemer og varamedlemer blir valde av kommunestyret sjølv. Medlemene blir valde for valperioden.

Rådet skal bestå av 4 medlemer og 3 varamedlemer. I tillegg skal rådet ha ein politisk medlem med personleg vara.

Medlemer og varamedlemer bør vera folkeregistrert i kommunen.

4 av kandidatane til rådet blir foreslåtte av organisasjonar som representerer personar med ulike funksjonsnedsetjingar. 1 av kandidatane til rådet skal veljast blant medlemer eller varamedlemer av kommunestyret.

Valkomiteen innstiller samansetninga til rådet til kommunestyret. Innstillinga skal vareta kravet til kjønnsbalanse i koml. § 7-7 tredje avsnitt.

Rådet vel sjølv leiaren og nestleiaren sin.

§ 12-3 Mynde

Seniorrådet skal vera eit rådgivande organ for andre folkevalde organ. Administrasjonen kan nytta rådet som medverknads- og høyringsorgan.

Rådet har rett til å uttala seg i alle saker som berører eldre, men rådet skal ikkje behandla saker som gjeld avgjerder overfor enkeltpersonar.

Rådet skal ha høve til å uttala seg til alle saker innanfor ansvarsområdet sitt som skal til behandling i kommunestyret. Dersom saka blir førebudd i eit hovudutval eller formannskapet, skal uttalen frå rådet innhentast før saka blir behandla i desse utvala, slik at rådets evt. utsegner ligg føre ved behandling av saka i nemnde utval.

Saker innanfor ansvarsområdet til rådet som blir vedtekne endeleg i eit hovudutval eller i formannskapet, skal på same måte sendast rådet for uttale før behandling i første utval.

Rådets uttale skal følgja saksdokumenta til det folkevalde organet som gjer endeleg vedtak i saka.

Rådet kan på eige initiativ ta opp saker som gjeld eldre Slike saker skal sendast til behandling/oppfølging i det hovudutvalet som har ansvar for det aktuelle saksområdet. Rådet skal få tilbakemelding etter behandling i hovudutvalet eller overordna organ.

Rådet skal givast høve til å uttala seg før kommunestyret vedtek nytt, eller gjer endringar i reglementet for rådet.

§ 12-4 Ansvarsområde

Seniorrådet skal aktivt arbeida med, m.a. gi rådgivande utsegner i saker innanfor ansvarsområda sine. Dette omfattar mellom anna saker som:

• Årsbudsjetta til kommunen og økonomiplanar
• Kommuneplan og kommunedelplanar
• Reguleringsplaner, særleg saker som berører utbygging av eldrebustader/seniorleilegheiter, og tilrettelegging av uteområde og by- og nærmiljøutvikling tilrettelagt for eldre
• Mobilitet
• Helse-, pleie og omsorgstilbod for eldre
• Saker om folkehelse og førebyggjande arbeid retta mot eldre
• Saker om kultur, idrett og fritidstilbod retta mot eldre
• Frivilligheitspolitikk, særleg eldre som ressurs
• Digitalisering og bruk av velferdsteknologi

Rådet skal så snart som mogleg etter konstituering vedta ei oversikt over kva fokusområde rådet skal jobba med i den kommande fireårsperioden.

Alle medlemene, utanom leiar og nestleiar skal få eitt eller fleire ansvarsområde som dei skal følgja opp spesielt. I dette ligg både oppfølging av saker som kjem inn til rådet frå administrasjonen, frå folkevalde organ eller frå organisasjonar som fremjar interessene til eldre. Medlemmer kan på eige initiativ ta opp saker som gjeld eldre innanfor ansvarsområdet sitt. Følgjande ansvarsområde bør varetakast:

• Samarbeid frivillige lag og organisasjonar
• Tettstadsutvikling
• Samferdsels- og mobilitet
• Digitalisering og teknologi
• Helse- og omsorg
• Kultur, idrett og fritid

§ 12-5 Saksbehandling

Rådet held møte etter ein møteplan vedteke av kommunestyret og elles når leiaren finn det nødvendig, eller når minst 1/3 av medlemmene krev det.

Rådet behandlar sine saker i møte. Innkalling og saksdokument blir sende digitalt.

Det generelle reglementet for saksbehandling i folkevalde organ gjeld for møte i seniorrådet.

Rådet kan be kommunedirektøren informera rådet om enkeltsaker og framdrift/resultat av saker rådet har fremja.

§ 12-6 Årsberetning

Rådet skal kvart år utarbeida ei årsmelding rundt verksemda si, som blir framlagd for kommunestyret seinast i april det etterfølgjande året.

Årsmeldinga bør innehalda oversikt over talet på møte gjennomført sist år, kva saker som er behandla, og dessutan ei forklaring over dei mest sentrale sakene rådet planlegg å jobba med framover.